Promoción da igualdade
1. Que é a transversalidade de xénero e como se aplica nas políticas públicas?
A transversalidade de xénero é o principio polo cal a igualdade entre mulleres e homes debe integrarse en todas as políticas públicas, con independencia do ámbito ao que pertenzan. Isto implica analizar o impacto das decisións públicas desde a perspectiva de xénero e adoptar medidas que eviten desigualdades e promovan a igualdade real en todos os sectores.
2. Que son a discriminación sexista múltiple e interseccional?
Prodúcese discriminación sexista múltiple cando unha persoa é discriminada de forma simultánea ou consecutiva por razón de sexo e por outra ou outras causas de discriminación.
Prodúcese discriminación sexista interseccional cando, xunto co sexo, concorren ou interactúan outra ou outras causas de discriminación, xerando unha forma específica de discriminación.
3. Que diferencia hai entre sexo e xénero?
O "sexo" fai referencia ás características físicas, anatómicas e fisiolóxicas que diferencian aos seres humanos, conformando as categorías de sexo feminino, sexo masculino e persoas intersexuais.
Estas categorías non determinan cuestións sociais como o comportamento ou a identidade. Para facer referencia a estas cuestións emprégase o termo de "xénero" e as categorías de muller, home e persoa non binaria.
Para saber máis podes consultar este glosario de conceptos básicos.
4. Como podo facer un uso non sexista da linguaxe?
A linguaxe, ao reflectir as prioridades e valores culturais dunha sociedade, pode poñer de manifesto dinámicas sociais, incluídas aquelas vinculadas ás desigualdades de xénero. O feito de nomear ou non nomear certas realidades ten efectos sociais concretos: o que non se nomea tende a non existir no imaxinario colectivo. Así, en contextos onde predominan estruturas tradicionais centradas no masculino, a linguaxe pode invisibilizar as mulleres, o que contribúe á súa exclusión tanto simbólica como material.
Para máis información consulta a guía de linguaxe non sexista e inclusiva.
5. Se sufrín algunha forma de discriminación por ser muller, que podo facer?
Podes acudir ao teu Centro de Información á Muller (CIM) máis achegado. Neste servizo poderás recibir orientación profesional sobre recursos específicos que se axusten ao teu caso, así como asistencia legal e atención psicolóxica gratuíta de ser precisas.
6. Se sufrín algunha forma de discriminación por ser LGBTI, que podo facer?
Podes acudir ao teu Centro de Información á Muller (CIM) máis achegado para recibir información e asesoramento gratuíto. A atención ao colectivo LGBTI é unha das funcións deste servizo, tamén para persoas non binarias e homes do colectivo.
Podes chamar ao Teléfono Arco da Vella 028, un servizo de atención 24h no que podes recibir información, asesoramento legal e atención psicolóxica.
No caso de que a discriminación fose exercida por unha institución, podes poñerte en contacto co Observatorio galego contra a discriminación por orientación sexual e identidade de xénero para presentar unha queixa ou denuncia.
7. Se son un home, podo acudir a un Centro de Información á Muller (CIM)?
Os Centros de Información á Muller son recursos dirixidos á promoción da igualdade de xénero e están abertos a toda a cidadanía. Toda persoa pode acudir a este servizo para solicitar información relacionada coa promoción da igualdade.
Porén, o servizo está dirixido en especial a mulleres e persoas LGBTI, e os recursos de asistencia legal e psicolóxica están enfocados a estes dous grupos. Tamén cómpre sinalar que contan con prioridade na atención as vítimas de violencia de xénero e as mulleres pertencentes a colectivos vulnerables ou en risco de exclusión social.