A directora xeral de Relacións Laborais, Elena Mancha, participou hoxe nunha charla a escolares do IES IIa de Ons, emprazado en Bueu, no marco da campaña Ti elixes para o fomento da presenza feminina en sectores masculinizados, unha iniciativa que nesta ocasión contou coa colaboración de Fundamar.

Na súa intervención, Mancha fixo fincapé na importancia de elixir unha profesión polas habilidades que se teñan, as capacidades ou as mesmas motivacións, rachando cos estereotipos sobre que non pode haber mulleres en sectores tradicionalmente ocupados por homes.

Ti Elixes é unha campaña audiovisual que está a desenvolver a Xunta por 75 centros educativos galegos para traballar no eido escolar no cambio de estereotipos de xénero que afectan a determinadas profesións, como é o sector das TIC, con menos presenza feminina. “O que queremos promover é que as profesións non son só de homes ou de mulleres”, apuntou. Neste senso, e referido ao sector da pesca, salientou que só un 5,4% do cadro de persoal en pesca extractiva (sen ter en conta o marisqueo) está composto por mulleres, unha cifra incluída no Plan de Igualdade de xénero no sector pesqueiro e acuícola 2021-2027. Tamén destacou a pouca presenza feminina noutras actividades marítimas como é o persoal a bordo das embarcacións.

A iniciativa, en concreto, estase a realizar en colexios de ensinanza secundaria que estean polo xeral situados próximos a institutos de formación profesional nos que se ofreza cualificación de familias de sectores tradicionalmente masculinizados. Na campaña participa persoal formador especializado en igualdade laboral e mulleres referentes que prestan servizos en sectores masculinizados, e que principalmente estudaron ciclos de FP de construción, metal, vinculados con actividades do mar, de primeira transformación da madeira, das TICs e granito.

Con este mesmo obxectivo, de romper cos estereotipos de xénero que existen á hora de elexir unha profesión, Elena Mancha destacou que os orzamentos da Consellería de Promoción do Emprego e Igualdade para o próximo ano 2024 recollen 2,25 millóns de euros para fomentar a presenza feminina en profesións masculinizadas, co obxectivo de formar e contratar unhas 300 mulleres.

En palabras de Mancha, o que se busca tamén con esta acción é cubrir as vacantes laborais de difícil cobertura como condutoras de camión, por exemplo, e romper coa fenda salarial, que moitas veces ven motivada polos tipos de traballo.

A axuda que se concederá con este programa será a equivalente ao custo da formación, prospección e contratación nos sectores que se determinen que teñan unha infrarrepresentación do sector feminino cun máximo por cada muller insertada de 7.500 euros (formación + axuda á contratación).