CIMs Móbiles

A quen van dirixidos?

• Mulleres que o demanden, de forma individual ou colectiva formando parte dun grupo ou asociación de mulleres.
• Calquera persoa, en asuntos relacionados coa información, a atención e a prevención da violencia de xénero.

Entre este público potencial do servizo establécense dous grupos prioritarios:

• Mulleres vítimas de violencia de xénero, así como as fillas e fillos e as persoas menores ou maiores dependentes delas, coa intención de reducir o impacto negativo que a situación de violencia produce nestas persoas.

• Mulleres pertencentes a colectivos en situación de vulnerabilidade e/ou risco de exclusión social.

   

Que servizos prestan?

• Asesoramento xurídico, atención psicolóxica e orientación social ás mulleres vítimas de calquera forma de violencia de xénero e, de ser o caso, ás fillas, aos fillos e ás persoas menores ao cargo da muller vítima, ou ás persoas maiores dependentes, facilitando o acceso aos correspondentes recursos.
• Atención específica ás mulleres que, pola súa situación de especial vulnerabilidade, sexan susceptibles de sufrir calquera forma de violencia de xénero.
• Información sobre os recursos dispoñibles na contorna local, ou, de ser o caso, a nivel comarcal, provincial ou autonómico.
• Actuacións de dinamización para a sensibilización e prevención da violencia de xénero, coa finalidade de promover a erradicación dos roles e estereotipos de xénero que subxacen na base das violencias contra as mulleres.
• Establecemento de canles de comunicación e colaboración con outros axentes presentes no territorio que poidan ser de interese para o desenvolvemento das funcións anteriormente sinaladas.
• Calquera outra actuación que se adecúe ao obxectivo prioritario de prevención, sensibilización e loita contra todas as formas de violencia de xénero, incluídos os ámbitos social e laboral.