Centros de crise 24 horas

Que son?

Son recursos especializados para a atención de mulleres vítimas de violencia sexual da comunidade autónoma de Galicia , abertos as 24 horas os 365 días do ano.

A quen vai dirixido?

Mulleres maiores de 15 anos, independentemente de cal sexa a súa situación administrativa, que vivisen un intento ou unha situación de violencia sexual, recentemente ou no pasado, os seus familiares e persoas da súa contorna íntima, sen necesidade de presentar denuncia nin estar en disposición de facelo.

Poboación xeral ou aqueles dispositivos, recursos e sistemas da comunidade que requiran dun asesoramento especializado, información e formación en materia de violencia sexual.

Que servizos prestan?

• Asistencia xurídica: información, orientación e asesoramento xurídico específico, en función da demanda e necesidades das mulleres vítimas de violencia sexual.
• Intervención psicolóxica, orientada á crise e á redución/reparación das secuelas da violencia vivida, en función da demanda e necesidades das mulleres vítimas de violencia sexual.
• Intervención social, orientada ao asesoramento e á activación de recursos e redes de apoio social, trámites e asesoramento, incluída a orientación sociolaboral, en función da demanda e necesidades das mulleres vítimas de violencia sexual.
• Realización de accións de sensibilización, divulgación, prevención e formación para a sociedade en xeral e aos sistemas clave na loita contra a violencia sexual (sistema educativo, xudicial, policial, social, etc.).