Centro de Recuperación Integral para mulleres vítimas de violencia de xénero (CRI)

Que é?

Unidade adscrita ao órgano superior da Xunta de Galicia con competencias en materia de prevención e loita contra a violencia de xénero, para prestarlle atención integral ás vítimas de violencia de xénero e ás persoas delas dependentes, especialmente aos seus fillos e fillas.

A quen vai dirixido?

Mulleres que teñan acreditada a situación de violencia de xénero nos termos establecidos no artigo 5 da Lei galega 11/2007, do 27 de xullo, para a prevención e o tratamento integral da violencia de xénero. 

Persoas dependentes ou ao cargo destas mulleres, facendo unha especial mención ás súas fillas e fillos menores de idade e as/os menores que se atopen baixo a súa tutela ou garda e custodia.

Que servizos se prestan?

• Asesoramento xurídico: información, orientación e asesoramento xurídico específico, en función da demanda e necesidades das mulleres vítimas de violencia de xénero.
• Atención psicolóxica: atención específica ás mulleres vítimas de violencia de xénero e, de ser o caso, ás fillas, fillos e persoas menores ao cargo da muller vítima, ou maiores dependentes.
• Intervención social: orientada ao asesoramento e á activación de recursos e redes de apoio social, trámites e asesoramento, incluída a orientación sociolaboral, en función da demanda e necesidades das mulleres vítimas de violencia de xénero.
• Outras funcións:
  • Coordinación: o CRI actúa como centro de referencia e coordinador da Rede galega de acollemento e centro colaborador nas derivacións de vítimas de violencia de xénero fóra de Galicia e na recepción das que cheguen a Galicia derivadas desde outras partes do Estado.
  • Formación: o CRI actúa como centro de formación na loita contra a violencia de xénero, tanto para profesionais, fundamentalmente dos centros de información á muller e dos servizos sociais, como para o voluntariado e a cidadanía en xeral.