A Xunta dará a coñecer o seu servizo Quérote+ entre o alumnado universitario coincidindo co inicio do curso
Instalaranse mesas informativas e se celebrarán obradoiros sobre as relacións igualitarias, respectuosas e o bo trato entre os días 3 e 24 de setembro
A directora xeral de Promoción da Igualdade, María Quintiana, destaca a importancia de estar presentes en espazos nos que se congrega a poboación universitaria
Santiago de Compostela, 30 de agosto de 2025
O servizo Quérote+ súmase ás xornadas de benvida que organizan as universidades galegas no inicio do curso para dar a coñecer o funcionamento e actividades que a Xunta desenvolve a través deste recurso. Con esta finalidade, instalaranse mesas informativas nos campus e organizaranse obradoiros sobre ‘O coidado dos vínculos afectivos’, nos que se abordarán as relacións igualitarias, respectuosas e o bo trato.
A directora xeral de Promoción da Igualdade, María Quintiana, destacou a importancia de estar presentes nos espazos nos que se congrega a poboación universitaria. Ao respecto, sinalou que, logo de coñecer o servizo por esta vía, o alumnado fai uso do recurso, acudindo de forma presencial aos centros Quérote+ de toda Galicia, ou accedendo a través doutras vías, como as consultas online, por mensaxería instantánea ou por videochamada.
No curso anterior, segundo os datos facilitados polas respectivas universidades, as xornadas de benvida recibiron a un total de 4.500 persoas mozas, datos que se estiman semellantes no curso que se inicia.
Calendario
A planificación de mesas informativas e obradoiros nos campus universitarios é a seguinte: os campus de Ourense (no pavillón universitario), Pontevedra (na Escola de Enxeñería Forestal) e Vigo (no pavillón de deportes CUVI) acollerán mesas informativas de 10,00 a 13,00 horas os días 3, 4 e 5 de setembro, respectivamente.
O 15 de setembro celebrarase un obradoiro na Facultade de Enfermaría do campus de Lugo, de 09,00 a 12,30 horas. Os días 16 e 18 de setembro, entre as 11,00 e as 18,00 horas, instalaranse puntos de información nos campus Lugo (na facultade de Veterinaria) e A Coruña (no estadio universitario Mariña Dourada-Elviña).
Por último, o día 24 de setembro terá lugar un novo obradoiro no Colexio Maior Fonseca no campus de Santiago de Compostela, a partir das 18,00 horas.