A Xunta concede 400 axudas para favorecer o emprendemento feminino
O programa contempla catro modalidades de axuda, Emerxe, Impulsa e Innova, máis outra complementaria, Concilia; e as achegas oscilan entre os 8.000 e os 42.000 euros
Santiago de Compostela, 14 de novembro de 2025
O Diario Oficial de Galicia (DOG) recolle hoxe o listado de beneficiarias das axudas do programa Emega para o fomento do emprendemento feminino. Máis de 400 achegas concedéronse ao abeiro desta orde, que contou cun orzamento de máis de cinco millóns de euros, cofinanciados nun 60% pola Unión Europea (UE) no marco do programa FSE+ Galicia 2021-2027.
A orde deste ano presentou como principal novidade o reforzo de criterios específicos para a concesión das achegas, co obxectivo de prestar un maior apoio a mulleres maiores de 55 anos, a propostas de emprendemento no rural e en sectores masculinizados, así como favorecer a realización de proxectos colaborativos. Ademais, os Polos de Emprendemento e Apoio ao Emprego convértense en aliados estratéxicos da iniciativa, especialmente nas áreas rurais, co desenvolvemento dun programa de formación específica para as beneficiarias.
A convocatoria ten catro modalidades de axuda. A primeira delas é Emega Emerxe, con contías de ata 22.000 euros, para apoiar novas iniciativas empresariais e a creación de emprego feminino estable por conta propia e allea. A segunda, Emega Impulsa, con ata 17.000 euros de subvención, para favorecer a reactivación e a consolidación de empresas constituídas por mulleres, así como a implantación de medidas innovadoras para a mellora da competitividade. E a terceira modalidade de achega é Emega Innova, con contías de ata 42.000 euros, para o desenvolvemento de iniciativas empresariais con contido científico ou con base tecnolóxica.
Por último, e co obxectivo de favorecer a conciliación, esta liña de axudas cunha axuda complementaria ás tres anteriores, Emega Concilia. Con esta modalidade preténdese dar pasos adiante na conciliación entre a vida persoal, familiar e laboral tanto das mulleres promotoras da iniciativa empresarial como das traballadoras por conta allea.