Fabiola García destaca as melloras proxectadas na residencia de maiores pública autonómica José Otero
Investiranse 230.000 euros na renovación do sistema de climatización do inmoble
[node:field_media_images:0:entity:field_media_image:alt]
Santiago de Compostela, 15 de febreiro do 2026
A conselleira de Política Social e Igualdade, Fabiola García, destacou hoxe o esforzo que fai a Xunta de Galicia na mellora e acondicionamento dos centros de maiores da rede pública autonómica. Fíxoo durante unha visita á residencia José Otero, na que se investirán 230.000 euros na mellora das condicións térmicas e de climatización do edificio.
Fabiola García explicou que o obxectivo desta actuación é que os residentes gañen en comodidade e en benestar, mantendo na instalación cunhas temperaturas axeitadas a cada época do ano. O contrato está nestes momentos en licitación e as empresas interesadas teñen de prazo ata o vindeiro día 2 de mazo para presentar as súas propostas.
As obras consistirán na substitución dos equipos de climatización situados no soto do inmoble por uns novos que se instalarán na cuberta do mesmo. O prazo previsto de execución dos traballos é de dous meses, contados a partir da adxudicación, e están financiados con fondos europeos do Mecanismo de Recuperación e Resiliencia (NextGenerationEU).
Recurso do Goberno central
Por outra parte, a conselleira denunciou que nestes momentos xa hai 2.600 galegos aos que a Xunta non lles pode conceder automaticamente a discapacidade por culpa do recurso do Goberno central e pediu de novo a súa retirada. Ademais, criticou que o Executivo central actúe desta maneira con Galicia só polo seu afán recaudatorio.
Neste sentido, advertiu da contradición que supón que o Goberno central recorra un modelo que copia na súa proposta para a modificación da Lei de Dependencia, pero quitando os beneficios fiscais aos que teñen dereito estas persoas.
