O Centro de Emerxencia para Mulleres en Situación de Violencia de Xénero, forma parte da Rede Galega de acollemento, e nace coa finalidade de proporcionar aloxamento inmediato e de curta estancia ás mulleres (e ás súas fillas e fillos) que se atopen inmersas nunha situación de malos tratos, garantíndolles un acollemento de emerxencia mentres se valora a súa situación, se inicia o tratamento ou se efectúa unha derivación a outro dispositivo máis axeitado.

Esta xuntanza entre a responsable de Igualdade da Xunta de Galicia e a concelleira de Vigo, terá continuidade no mes de setembro, coa finalidade de analizar con maior detalle o funcionamento e melloras no Centro de Emerxencia.

A secretaria xeral da Igualdade manifestou a súa vontade de continuar os contactos e o diálogo coas persoas responsables da áreas de Igualdade das distintas entidades municipais de Galicia, co fin de promover a igualdade e traballar pola erradicación da violencia de xénero en todo o territorio galego.