A Xunta destaca en Celanova o papel das mesas locais contra a violencia de xénero para garantir a eficacia dos recursos destinados ás vítimas

A secretaria xeral da Igualdade, Susana López Abella, asistiu hoxe á xuntanza da mesa de coordinación contra a violencia de xénero da Mancomunidade Terra de Celanova

A Xunta avoga por reforzar estes órganos e favorecer a súa implantación nos 218 municipios que integran a Rede de entidades locais contra a violencia de xénero

  •  A Xunta destaca en Celanova o papel das mesas locais contra a violencia de xénero para garantir a eficacia dos recursos destinados ás vítimas
  •  A Xunta destaca en Celanova o papel das mesas locais contra a violencia de xénero para garantir a eficacia dos recursos destinados ás vítimas
  •  A Xunta destaca en Celanova o papel das mesas locais contra a violencia de xénero para garantir a eficacia dos recursos destinados ás vítimas
  •  A Xunta destaca en Celanova o papel das mesas locais contra a violencia de xénero para garantir a eficacia dos recursos destinados ás vítimas

Celanova (Ourense), 17 de febreiro de 2022.-

A secretaria xeral da Igualdade, Susana López Abella, asistiu hoxe á xuntanza da mesa local contra a violencia de xénero da Mancomunidade Terra de Celanova, onde destacou o importante papel destes órganos na prevención e actuación áxil ante a detección de casos desta lacra. López Abella subliñou que son “factor determinante” para conseguir unha mellor eficacia e complementariedade dos recursos destinados á intervención integral coas vítimas.
As mesas locais constitúen una ferramenta operativa na que están representados todos os ámbitos municipais implicados, directa ou indirectamente, na loita contra a violencia de xénero. Ademais de membros da Mancomunidade, dos concellos que a integran e da Xunta e do Goberno central; na mesa de hoxe sentáronse interlocutores do Centro de Información á Muller de Celanova, da Garda Civil e da policía local, e varias persoas de centros educativos e sanitarios das localidades que integran o ente supramunicipal.

A Xunta traballa para incrementar o grao de calidade da coordinación interinstitucional e contribuír, deste xeito, a optimizar a accesibilidade aos recursos e á prestación de servizos de atención ás mulleres. “A coordinación e a colaboración son as premisas fundamentais para unha atención máis áxil, eficiente e eficaz ás mulleres que ven vulnerados os seus dereitos por mor da violencia de xénero”, remarcou a secretaria xeral.

Tal e como destacou López Abella, o Goberno galego traballa co obxectivo de intensificar o traballo destas entidades nos concellos que xa as teñen constituídas e axudar á súa creación naqueles nos que aínda non existe. Esta posibilidade está aberta no caso dos 218 municipios que integran a Rede de entidades locais contra a violencia de xénero. Para favorecela, a Secretaría Xeral da Igualdade ten ao seu dispor cadanseus manuais de apoio, unha guía de carácter práctico para a constitución das mesas locais de coordinación interinstitucional contra a violencia de xénero; e unha segunda guía dirixida á dinamización dos órganos existentes.