Santiago de Compostela, 16 de setembro de 2023

O prazo de inscrición no programa formativo Impulsa Emprego Verde, destinado a mellorar a cualificación de mulleres desempregadas galegas -principalmente residentes en núcleos rurais- para que accedan a oportunidades laborais no eido da economía sustentable, permanecerá aberto ata o próximo 2 de novembro.

A actividade de formación en liña e dunha duración de 32 horas está promovida pola Fundación Santa María la Real e apoiada pola Xunta de Galicia. Promove obradoiros e itinerarios personalizados para que as beneficiarias adquiran habilidades de cara a ocupar novos postos de traballo vencellados coa economía verde. Bríndaselles, así, formación en liña e gratuíta a través de sesións grupais, asesoría individual e webinarios profesionais.

Poden participar nesta iniciativa mulleres en desemprego de 18 a 65 anos que residan, principalmente, en zonas rurais. Galicia foi unha das tres comunidades escollidas este ano para celebrar esta actividade.

Impulsa Emprego Verde identifica as necesidades formativas relacionadas co emprego verde para mellorar a procura de emprego en sectores con maior proxección profesional.

As persoas interesadas en participar nesta iniciativa en liña e gratuíta teñen de prazo ata o 2 de novembro para realizar a súa inscrición a través dunformulario en liña.