Esta convocatoria, que foi aprobada onte polo Consello da Xunta, conta para 2010 cun crédito de 3.245.000 euros, cofinanciados polo Fondo Social Europeo nun 80%, o que supón 333.300 euros más que no ano 2009. Desta cantidade, 245.000 euros son para a formación de mulleres cara á mellora da empregabilidade.

A secretaria xeral da Igualdade indicou que "aínda que a situación económica é delicada, os CIM foron desde un primeiro momento unha prioridade para o goberno galego" unha vez que a actuación destes centros "supón o exercicio dunha das intervencións fundamentais para o cumprimento dun obxectivo prioritario das políticas públicas: a promoción da igualdade entre mulleres e homes", por isto, a área de Igualdade "dedica un importante esforzo á cooperación coas administracións locais, a través do financiamento destes 77 centros".

Os CIM, dixo Marta González, teñen a finalidade de garantir a prestación dun servizo de atención ás mulleres que lles proporcione asesoramento xurídico e psicolóxico, información sobre os recursos específicos existentes, así como o desenvolvemento de actividades formativas vinculadas á empregabilidade feminina e calquera outra actividade que teña como obxectivo prioritario a promoción da igualdade entre mulleres e homes.

Mantemento de emprego estable

Este ano a convocatoria ten importantes novidades no que atinxe aos tipos concretos de axuda e á súa forma de xustificación, que reduce a burocracia, e que incidirán moi positivamente na flexibilización e na axilización do proceso de xestión.

De feito, sinalou a secretaria xeral da Igualdade, "a totalidade do financiamento destinado ao funcionamento dos CIMs vai dirixida a apoiar a actividade desenvolvida a través das profesionais que desempeñan a súa actividade profesional neles, incorporando ademáis dun novo perfil profesional que desenvolva funcións de animación sociocultural ou dinamización de igualdade, a través das correspondentes figuras profesionais, animador ou animadora sociolcultural e axente de igualdade".

A creación deste novo perfil profesional responde a necesidade actual de que os servizos especializados que se ofrecen dende os CIM se complementen con estratexias, recursos e técnicas de dinamización que fagan que o servizo sexa un verdadeiro servizo integral de atención e apoio ás mulleres, planificado no seu conxunto, que integre o traballo especializado e individualizado con tarefas de análise, sensibilización e actuacións colectivas na totalidade da poboación da súa área de influencia, e que a súa vez interrelacione, traballando en rede con outros centros.
 

Anticipos e formación

Ademais, explicou a responsable de igualdade do goberno galego, a convocatoria deste ano establece un sistema de anticipos, que permite que, dentro do mes seguinte á notificación da concesión, "os concellos podan solicitar anticipos de ata o 80% da axuda", o que lles permitirá, como acontecía ata agora, non ter que adiantar os recursos económicos relativos ao mantemento dos CIM, e polo tanto, "dispoñer dos recursos cando realmente os precisan, máxime neste momento coxuntural no que se atopan nunha situación financieira delicada e reciben maior demanda de servizos".

Outra das novidades é que, ademais das axudas económicas para o mantemento dos centros de información ás mulleres, a convocatoria recolle unha liña de actuación específica dirixida a realización de proxectos formativos para mulleres. O crédito destinado a esta liña son 245.000 euros, podendo acadar a subvención o 100% do custo da acción sen superar o custo de 12.000 euros por proxecto formativo.

Deste xeito, indicou a secretaria xeral da Igualdade, "quérese promover a realización por parte dos centros de información as mulleres, de programas de formativos deseñados en función das demandas das mulleres do contorno que atenden, e poder ofrecer así unha formación máis axeitada ás súas necesidades, favorecendo a coordinación integral de todos os servizos que presta un centro de información ás mulleres".