A Xunta presenta a campaña do Día Internacional Contra a Violencia de Xénero baixo o lema “Fronte á violencia de xénero só cabe unha resposta. Sen ningún xénero de dúbida. Non”

A secretaria xeral da Igualdade, Susana López Abella, explicou hoxe en rolda de prensa os detalles desta campaña, que busca implicar a toda a sociedade  na loita contra esta lacra.

Emitiranse  60 spots e preto de 500 cuñas en todas as radios galegas. Publicaranse 31 anuncios na prensa e máis de dos millóns de banners e a maiores, haberá  un centenar de vallas por toda Galicia.

Serán distribuídos 40.000 carteis en locais comerciais, de hostalería, edificios e centros públicos, concellos, centros de saúde, xulgados e centros educativos.

O vindeiro 25 de novembro terá lugar a VI edición da andaina “Camiño ao respecto”, que percorrerá o treito que une o Monte do Gozo coa Praza do Obradoiro

  • A secretaria xeral da Igualdade, Susana López Abella, explicou hoxe en rolda de prensa os detalles desta campaña.
  • A secretaria xeral da Igualdade, Susana López Abella, explicou hoxe en rolda de prensa os detalles desta campaña.

Santiago de Compostela, 10 de novembro de 2018.- A secretaria xeral da Igualdade, Susana López Abella, presentou hoxe en rolda de prensa a campaña institucional para o Día internacional para a eliminación da violencia de xénero, que se celebra o próximo 25 de novembro.

 Nesta edición, o lema da campaña terá unha mensaxe,clara e directa “Fronte á violencia de xénero só cabe unha resposta. Sen ningún xénero de dúbida. NON”, e emitiranse uns 60 spots en Televisión de Galicia e preto de 500 cuñas en todas as radios galegas. Publicaranse 31 anuncios na prensa e máis de dos millóns de banners e a maiores, haberá  un centenar de vallas por toda Galicia. Serán distribuídos, por todas as vilas e cidades de Galicia 40.000 carteis en locais comerciais, de hostalería, edificios e centros públicos, concellos, centros de saúde, xulgados e centros educativos.

 Con este lema, a Xunta quere decirlle  NON a todas a formas de violencia de xénero que están recollidas na Lei 11/2007, do 27 de xullo, galega para a prevención e o tratamento integral da violencia de xénero e que se recollen no seu artigo 3: Violencia física, Violencia psicolóxica, Violencia económica, Violencia sexual e abusos sexuais, Acoso sexual, e a  trata de mulleres e nenas con fins de explotación sexual.

 A campaña rematará o próximo 25 de novembro, data na que terá lugar en Santiago de Compostela a sexta edición da andaina “Camiño ao respecto”, que sairá   dende o Monte do Gozo ás 11:00 horas ata a Praza do Obradoiro coa lectura dun manifesto contra da violencia de xénero, aproximadamente ás 12:30 horas.

 Na súa intervención, López Abella recordou que o compromiso contra a violencia de xénero debe estenderse aos 365 días do ano, e que é preciso seguir sensibilizando a toda a sociedade na loita e prevención da violencia de xénero.

 O goberno galego porá en marcha durante estes meses accións que abranguen todos os ámbitos de actuación na loita contra a violencia de xénero e na atención ás mulleres vítimas e aos seus fillos e fillas, no ámbito educativo, universitario, deportivo, veciñal, asociativo, rural, así como nos distintos sectores profesionais e sociais e nas entidades locais de Galicia.