Soutomaior (Pontevedra), 26 de marzo de 2021.-
A secretaria xeral da Igualdade, Susana López Abella, clausurou hoxe a exposición Mulleres Sabias no edificio multiusos de Arcade, no Concello de Soutomaior, poñendo en valor as iniciativas que, como esta, contribúen a recuperar a memoria e a empoderar ás mulleres maiores do ámbito rural.
López Abella resaltou a necesidade de tomar como referentes as mulleres maiores xa que as súas vidas constitúen un exemplo para xeracións vindeiras. Neste sentido destacou a dimensión didáctica que o Concello de Soutomaior imprimiu á mostra que primeiro pasou pola Alameda de Talo Río, en Arcade, para ser visitada pola poboación en xeral; e que agora terá a súa continuidade no deseño dunha unidade didáctica para o instituto de Soutomaior. “É fundamental traballar coa mocidade, no eido educativo, cara a romper estereotipos de xénero, previr todas as formas de violencia e, sobre todo, concienciar”, manifestou.