A Xunta concede as Medallas Emilia Pardo Bazán a Marijé Díaz, Zaza Ceballos e á Asociación Mirabal

O xurado vén de fallar estes galardóns por terceiro ano consecutivo cos que se recoñece o labor a favor da igualdade para construír unha sociedade máis igualitaria baseada nos principios de igualdade, xustiza e solidariedade

María Jesús Díaz Sánchez, que recibirá a medalla a título póstumo, fundou en 2001 a Asociación Alar Galicia de loita polos dereitos das persoas máis desfavorecidas, e foi a súa presidenta desde entón e ata o seu falecemento en xaneiro de 2009

Zaza Ceballos é produtora, escritora e directora de cine e unha das mulleres pioneiras no sector do audiovisual de Galicia

A Administración autonómica tamén recoñece nesta edición o labor da Asociación MIrabal, que leva máis de 10 anos prestando atención ás mulleres vítimas de violencia de xénero e aos seus fillos e fillas nos concellos de Curtis, Oza-Cesuras e Pontedeume

Multimedia

A Xunta concede as Medallas Emilia Pardo Bazán a Marijé Díaz, Zaza Ceballos e á Asociación Mirabal
Santiago de Compostela, 16 de xullo de 2021.-
 
A fundadora e presidenta entre 2001 e ata o seu falecemento en 2009 da Asociación Alar de Galicia, María Jesús Díaz Sánchez; a produtora, escritora e directora de cine, Zaza Ceballos; e a Asociación Mirabal recibirán as Medallas Emilia Pardo Bazán na terceira edición destes premios. O xurado vén de fallar estes galardóns cos que a Xunta recoñece o labor a favor da igualdade de oportunidades para construír unha sociedade máis igualitaria baseada nos principios de igualdade, xustiza e solidariedade.
 
María Jesús Díaz, máis coñecida como Marijé Díaz, recibirá a medalla a título póstumo. Fundou en 2001 Alar Galicia para loitar polos dereitos das persoas máis desfavorecidas, incidindo sempre no rostro de muller da pobreza e sempre loitando pola igualdade de xénero e potenciando os recursos das mulleres para acadar o empoderamento real. O seu labor estivo centrado na profesionalización da muller para favorecer a súa autonomía. Na súa traxectoria profesional, ademais, elaborou varios informes e medidas de apoio contra a violencia de xénero e vítimas de violencia machista. Dirixiu, ademais, estudos de investigación social para sacar á luz a realidade das mulleres que máis sofren e proxectos de inserción social e laboral de mulleres en situación de precariedade.
 
Zaza Ceballos, pola súa banda, é unha das pioneiras do sector audiovisual de Galicia. Produtora, escritora e directora cinematográfica galega, no ano 1985 comezou a traballar na Televisión de Galicia, ocupando diversos postos de responsabilidade. Tamén foi membro da comisión de expertos para a concesión das axudas da Consellería de Cultura e responsable de coproducións nacionais e internacionais, levando, ademais, a produción de series de televisión e de ficción documental. En 1998 fundou Zenith Televisión, onde actualmente é directora e produtora executiva de diferentes películas, entre elas, sobre Emilia Pardo Bazán, Concepción Arenal ou Rosalía de Castro. Tamén é profesora de creación no Mestrado de desenvolvemento e distribución de contido audiovisual, na Facultade de Ciencias Sociais e da Comunicación da Universidade de Vigo.
 
Mirabal, tamén galardoada nesta edición cunha das Medallas Emilia Pardo Bazán, é unha asociación que leva traballando máis de 10 anos na atención a mulleres vítimas de violencia de xénero e os seus fillos e fillas, non só no ámbito municipal, tamén comarcal, prestando servizos nos concellos de Curtis, Oza-Cesuras e Pondedeume. O colectivo desenvolve un traballo integral de atención e acompañamento ás mulleres vítimas da violencia de xénero e os seus fillos e fillas.


Desde 2019

As Medallas Emilia Pardo Bazán constitúen unha iniciativa que a Xunta creou en 2019 para o recoñecemento de accións relevantes a favor da igualdade entre mulleres e homes. Poden ser destinatarias das medallas persoas ou colectivos, entidades ou institucións de carácter público e privado que coa súa traxectoria ou labor contribúan no desenvolvemento na nosa comunidade de accións relevantes neste ámbito. Cada ano outórganse tres condecoracións, todas elas de carácter exclusivamente honorífico.

Coas Medallas Emilia Pardo Bazán outórgase, polo tanto, un recoñecemento público ás medidas desenvolvidas en Galicia en prol da igualdade efectiva. A concesión das mesmas axuda á sensibilización social, á visibilización dos talentos e das capacidades das mulleres e para que se recoñeza a traxectoria vital e profesional de persoas e entidades comprometidas con erradicar as discriminacións de xénero e coa construción dunha sociedade máis igualitaria.

Estes galardóns levan o nome de Emilia Pardo Bazán por tratarse dunha precursora nas ideas acerca dos dereitos das mulleres e do feminismo e polo seu carácter reivindicador da educación das mulleres, tendo incorporado en todas as súas obras ideas sobre a modernización da sociedade e o acceso das mulleres aos mesmos dereitos e oportunidades que tiñan os homes na súa época.

 
Tema: 
Igualdade