Asegura que os logros da deportista nas recentes competicións internacionais levan detrás moitas horas de adestramento, renuncias e sacrificio e son un estímulo para as deportistas da Comunidade que aspiran a estar na elite das súas respectivas modalidades
Recoñece a súa satisfacción ao constatar a vitalidade dos deportes náuticos en Galicia dado o interese estratéxico que teñen para unha Comunidade con excelentes condicións nas súas costas, ríos e encoros
Vigo, 10 de setembro de 2014. O secretario xeral para o Deporte, José Ramón Lete Lasa, felicitou á piloto viguesa de motonáutica Sandra Fernández, polos seus recentes logros deportivos, tras conquistar o primeiro posto no Campionato do Mundo de Motos Acuáticas, celebrado en Ibiza o pasado fin de semana, e lograr outro tanto no Campionato de Europa de Circuíto de Motos Acuáticas, que tivo lugar na localidade portuguesa de Mirandela os días 26 e 27 de xullo.
Na recepción celebrada esta tarde no peirao de Bouzas do Porto de Vigo, Lete Lasa asegurou que “todos os que pertencemos dun xeito ou doutro ao mundo do deporte, e os propios afeccionados, sabemos moi ben que ese xeito que tes de ‘voar sobre a auga’ nunha modalidade que exixe estar en magníficas condicións físicas, e estes resultados nas competicións, levan detrás moitas horas de adestramento, renuncias e sacrificio, unidos á paixón e á sa ambición por ser cada día mellores no que da sentido e plenitude ás nosas vidas”.
No caso da deportista viguesa, o secretario xeral destacou o seu especial mérito por ter gañado cinco veces o Campionato Galego de Motos Acuáticas modalidade Jet Ski (tempadas 2005, 2006, 2011, 2012 e 2013), sendo a única muller participante e superando a todos os seus competidores. “Proba de que as deportistas galegas teñen moito que dicir no deporte de alta competición e para acadar os seus obxectivos terán sempre o apoio da Xunta de Galicia”, indicou, engadindo que os logros de Sandra Fernández son un estímulo para as deportistas da Comunidade que aspiran a chegar lonxe nos seus obxectivos deportivos.
Lete Lasa quixo lembrar que para o Goberno galego, a promoción dos deportes náuticos ten carácter estratéxico polas excelentes condicións que ofrecen as súas costas, ríos e encoros, o que se reflicte nas políticas desenvolvidas desde a Secretaría Xeral para o Deporte. “É por tanto unha especial satisfacción constatar que a modalidades como o piragüismo ou a vela engádese a vitalidade doutras máis novas, neste caso a motonáutica, e das mans dunha muller como Sandra Fernández”, indicou.
O secretario xeral para o Deporte rematou a súa intervención afirmando que “Galicia agradéceche que, xunto ao teu nome, o da nosa Comunidade se proxecte no mundo a través dos circuítos internacionais nos que participas con tanta autoridade e brillantez”, manifestando que a achega á boa imaxe de Galicia que fan os deportistas galegos da elite mundial “é moi alta e, polo tanto, non pode ser menos o noso recoñecemento, orgullo e apoio, o da Xunta e o de todos os galegos”, remarcou. Lete Lasa concluíu augurando que a carreira deportiva de Sandra Fernández “seguirá a dar moitas alegrías e boas novas ao deporte galego”.