O presidente da Xunta, Alberto Núñez Feijóo, pediu, esta tarde, ás mulleres que sofren violencia de xénero que "tomen a palabra". "Tomar a palabra –aseverou- é o primeiro paso para actuar". O titular do Goberno galego manifestou que "temos que conseguir que as mulleres que viven con medo saiban que estamos con elas, e que poremos todo o noso esforzo na construción dunha sociedade comprometida coa igualdade".

O titular autonómico afirmou que estamos diante dun problema complexo, ao que hai que facer fronte desde moi diversos ámbitos: o da sensibilización da sociedade no seu conxunto, o da intervención coas mulleres, o castigo dos agresores e o da plena recuperación física, psicolóxica e social das vítimas.  "Somos conscientes de que chegar a unha solución non é sinxelo, pero tamén estamos convencidos de que as nosas leis, as nosas políticas, a nosa concienciación, inciden de xeito significativo nesa transformación cultural que se precisa para acabar coa desigualdade, e que se evidencia no rexeitamento frontal á violencia contra as mulleres que vivimos hoxe en día, así como na vontade unanimemente sentida de acabar con esta lacra anacrónica".

Feijóo que visitou a exposición As que comen silencios, as que toman a palabra, vivir sen violencia, destacou que este traballo desenvolvido por mulleres artistas de moi variadas procedencias xeográficas ten un obxectivo común: "facer tomar a palabra a aquelas mulleres que moitas veces viven no silencio, nun silencio forzado pola violencia".

Neste sentido, afirmou que "os obxectos artísticos reunidos nesta exposición non supeditan o seu valor artístico nin rebaixan a súa capacidade expresiva ou estética con esta carga simbólica, senón que é este poder de denuncia o que xustifica precisamente a súa mesma existencia, e a súa agrupación hoxe aquí, como representación material do noso compromiso cun futuro igualitario e sen violencia".

Logo de lembrar que Galicia ten vivido neste ano 2010 acontecementos "duros e difíciles" relacionados coa violencia contra as mulleres e destacar a decidida vontade da sociedade galega de acabar con esta situación, o presidente da Xunta salientou a importancia que teñen neste obxectivo as xeracións máis novas.

Nese compromiso de sensibilización, asegurou que a creación artística, co seu poder transformador e de denuncia de todo aquilo que non nos gusta da sociedade que nos rodea remove as conciencias, contribúe ao cambio e sinala e denuncia as situacións de opresión, de inxustiza e de desigualdade.