A igualdade entre mulleres e homes é un dereito básico. Desde o Servizo Galego de Igualdade, actúase para garantir este dereito en todos os ámbitos da sociedade. Desde 1998, estase a traballar en estreito contacto coa comunidade educativa, para facer efectivo o exercicio deste dereito fundamental, mediante unha serie de actuacións coordinadas a través do Seminario Permanente de Educación para a Igualdade. Entre estas cóntanse os cursos formativos destinados á comunidade escolar co fin de promover a construción dun novo modelo capaz de desenvolver todas as calidades individuais con independencia do xénero, tratando de corrixir os estereotipos e de propoñer un currículo equilibrado que elimine os trazos sexistas presentes na sociedade.

O presente foro, que alcanza a súa undécima edición, leva por título: “O currículo coeducativo: aplicacións prácticas”. O tema é de interese se temos en conta que no currículo educativo non só están reflectidas as intencións formativas, os obxectivos e contidos, as orientacións metodolóxicas e a avaliación, senón tamén os valores, actitudes e normas sociais establecidas. É aí onde o enfoque coeducativo debe terse en conta para evitar que a intervención no currículo se produza dun modo parcial e anecdótico.

Na medida en que coeducar é algo máis que introducir unha serie de novos contidos ou de levar a cabo unhas determinadas actividades, este novo foro propón á comunidade educativa elementos de reflexión sobre as propias actuacións docentes, a partir do coñecemento dos resultados de experiencias coeducativas levadas adiante por profesionais con experiencia na aplicación do enfoque coeducativo nos seus distintos currículos de referencia. Todo iso co obxectivo de poñer a disposición das e dos docentes algunhas ferramentas e recursos que lle faciliten o traballo en igualdade.