Durante o ano 2010, no marco das actividades de fomento da igualdade promovidas pola Xunta de Galicia, a Secretaría Xeral da Igualdade realizou tres exposicións que están a percorrer diferentes concellos da nosa comunidade; sen embargo foron moitos os municipios que quedaron fóra por problemas de tempo. Ante esa situación decidiuse ampliar a todo o ano 2011 estas exposicións, que están reunidas no programa "Con elas".

As corporacións municipais interesadas en expor algunha delas, durante un período aproximado de 15 días, poderán solicitalas, antes do 1 de decembro de 2010, enviando a solicitude de inscrición que pode descargarse na documentación adxunta desta nova.

As exposicións que integran o programa "Con elas" son:

• Elas sempre están, que pretende plasmar a realidade do medio rural galego e contribuír a visibilizar as achegas das mulleres do rural á sociedade, o recoñecemento do seu traballo e a súa achega ao benestar de todas as persoas.
• Elas ensinan, que recolle as historias de vida de dezaoito mestras galegas que compartiron o interese pola educación das xeracións máis novas, ás que serviron de modelo profesional e vital.
• Elas fan camiño, que quere dar a coñecer o protagonismo das mulleres nas rutas de peregrinación a Compostela, facendo un percorrido pola historia das mulleres que peregrinaron a Santiago desde os lugares máis afastados e relevantes do cristianismo, e que tamén foron protagonistas na creación e mantemento das diferentes rutas de peregrinación, verdadeiras vías de circulación da cultura e dos progresos técnicos e socioculturais durante séculos.